Ամանորյա տոները սթրես են օրգանիզմի համար

«Նշանակություն չունի, թե ինչ կպատահի Ձեզ հետ, այլ, թե ինչպես դուք կվերաբերվեք դրան»: Հանս Սելյե

Ամանորյա տոներն օրգանիզմի (և հոգու, և մարմնի) համար սթրես են: Ինչպես գլուխ հանել ամանորյա խառնաշփոթից: Հոգեբանները խորհուրդ են տալիս տոներին նախապատրաստվելիս  հումորի զգացումը չկորցնել, խորը շնչել և ամեն ինչին տրամաբանական մոտեցում ցուցաբերել: Չէ որ այդ օրերը չափից ավելի ուտելու, ալկոհոլիզմի և վնասվածքներ ստանալու ամենածանր ժամանակահատվածն  են: Օրգանիզմը մի շարք բարոյական և հոգեբանական ուժեր է ծախսում տոնական միջոցառումների նախապատրաստման, նաև հենց տարեմուտի վրա: Էլ չենք խոսում ՙվերականգնողական՚ շրջանի մասին, որը ձգվում է ամբողջ արձակուրդային օրերի ընթացքում:

Բժիշկներն, անկասկած, խորհուրդ են տալիս այդքան անտարբեր չլինել առողջության նկատմամբ, սակայն հարկ է ուրախանալ, ինչպես բոլորը: Միայն մի տարբերությամբ, եթե օժտված լինեք տարրական գիտելիքներով, ապա կօգնեք հոգուն և մարմնին այդպիսի ՙսթրեսային՚ իրավիճակներից ավելի հեշտ  դուրս գալ: Եվ այսպես.

Սթրես

Եթե դուք կարևոր գործերն անընդհատ թողնում եք վաղվան, ապրումներից, անկասկած, չեք խուսափի: Չէ որ ստույգ գիտեք` նոր տարին կգա, այդ ժամանակ էլ կմտածեք: Սակայն փորձեք ամեն ինչ հնարավորինս նախօրոք կատարել. հարազատների և ընկերների համար նվերներ ձեռք բերել, մեկ ամիս առաջ գրանցվել գեղեցկության սրահում, եթե այդ ծառայություններն անհրաժեշտ են: Չէ որ տոներին մոտ նման ծառայություններից ցանկացողների թիվն ավելանում է և չարժե հույս դնել հաջողության վրա:

Երբ արդեն սկսել եք Ամանորի համար անհրաժեշտ իրերի փնտրտուքով վազվզել այս ու այն կողմ, մի պահ կանգ առեք, խորը շունչ քաշեք, արտաշնչեք ու փակեք աչքերը: Երբ դրանք բացեք, ձեզ ավելի լավ կզգաք, ուժերն ու ողջախոհությունն էլ կավելանան:

Մեկ րոպե ծիծաղը կյանքը երկարացնում է կես ժամով: Չնայած ժամանակի մշտական անբավարարությանը, հնարավորություն գտեք որևէ գիրք կարդալու, հումորիստական հաղորդումներ դիտելու, ընկերների հետ շփվելու համար:  Հաճելի շփումներն ունակ են լիովին փոխելու ձեր տրամադրությունը: Ծիծաղը գլխացավի և հոգնածության դեմ ամենալավ դեղն է:

Տոներին նախապատրաստվելիս ձեր «հոգեկան իմունիտետին» կօգնի յոդ պարունակող մթերքը: Պաղպաղակը գերազանց կերպով հանում է սթրեսը, շոկոլադը բարձրացնում տրամադրությունը: Հետազոտությունների համաձայն, յուրաքանչյուր մարդ, ով իր քաղցրի չափաքանակը չի ստանում, միշտ գրգռված կամ ճնշված տրամադրություն է ունենում: Սակայն հիշեք, որ չափից ավելի շաքարը վնասակար է:

Սնունդը

Երբ նախատոնական բոլոր  հոգսերն ավարտվել են և արդեն նստել եք սեղանի շուրջ և մտածում եք, որ կարելի է արդեն թուլանալ, առողջ կենսակերպի ճանապարհին ևս մեկ «ծուղակ» է սպասվում:

Աշխատեք  ուտելը սկսել թեթև աղցաններից, ընդ որում, բանջարեղենային, որոնք բուսական ձեթով են համեմվել: Օգտակար բջջանյութերը ոչ միայն որոշ ժամանակ կհագեցնեն ախորժակը, այլև կնպաստեն հիմնական սննդի յուրացմանը:  Փորձեք խուսափել աղի, կծու ուտեստներից, որպեսզի այդ մի քանի օրերի ընթացքում ավելորդ կիլոգրամներ չհավաքեք: Նաև չմոռանաք, որ աղն օրգանիզմում պահում է ջուրը, որն էլ կարող է այտուցներ առաջացնել: Չափից ավելի հեղուկ մի ընդունեք, դա կարող է ստամոքսում փքվածություն դրսևորել: Եվ հիշեք. ամանորը տոն է, այլ ոչ թե ուտելու մրցույթ:

Սնունդը դանդաղ ծամեք: Իմաստուն չինացիներն ասում են.«Եթե ցանկանում  ես առողջ լինել սնունդը ծամիր 50 անգամ,  եթե ցանկանում ես երկարակյաց լինել` 100 անգամ, իսկ եթե ցանկանում ես անմահ դառնալ, ծամիր 150 անգամ»:

Ալկոհոլը

Տոնական սեղանի մոտ նստելուց առաջ խմեք սև, թունդ թեյ` կիտրոնով և մեղրով կամ սուրճ: Կիտրոնը չեզոքացնում է ալկոհոլի ազդեցությունը: 

Միջոցառումից մի քանի ժամ առաջ որևէ յուղոտ բրդուճ կերեք (օրինակ, հացի վրա կարագ քսած), որպեսզի ստամոքսի լորձաթաղանթի ճարպային թաղանթն արգելակի ալկոհոլի ներծծումը: Սակայն դրանից հետո ոչ մի յուղոտ ուտեստ չուտել: Ալկոհոլից հետո աշխատեք թեթև աղցաններ, բանջարեղեն ուտել:

Սպիրտային  խմիչքների ընդունումից հետո արյան մեջ բարձրանում է ացետիլալդեհիդի խտությունը, որն օրգանիզմում հանգեցնում է օքսիդա-վերականգնողական գործընթացների խանգարման, ինչի հետևանքով էլ առաջանում է թունավորում, կամ, ինչպես ժողովուրդն է անվանում`խումար:

Առավոտյան խումարից դուրս գալու համար, հարկ է թեթև սնունդ (ջրալի ճաշ, շիլաներ, թեյ և այլն), նաև ակտիվացված ածուխ ընդունել:

Բոլոր դեպքերում ամանորյա տոներն ու արձակուրդներն առջևում են: Աշխատեք այդ ընթացքում  լավ հանգստանալ և առանց առողջությանը վնասելու դիմավորել նոր տարին: Զուգորդեք ձեր ցանկություններն ու օրգանիզմի պահանջները, հաճախ լսեք ինքներդ ձեզ:

Հարցեր, պատասխաններ, մեկնաբանություններ